البرلمان \\\\ جاح ناجي اللوزه بغداد .......

قصيدتي الفائزه في المسابقه التي اقامتها مسسة ال السلطاني للثقافة والادب في يوم الاحد ١١ / ٩ / ٢٠١٦ في ملتقى رضا علوان

( البرلمان )
جنه نحلم إيصير عدنه برلمان
~~~~~~~~~~~~~~~~~~~~~~~~~~~~
برلمان مسيطره عليه الاحزاب
والشعب عايش بغفله وبالسراب
صفت خيرات البلد بيد الاغراب
وصار ثلثين النفط ... بيد الارهاب
كل هذا و بعد ......... ماكو امان
وجنه نحلم إيصير عدنه برلمان
~~~~~~~~~~~~~~~~~~~~~~~~~~~~~~~~~~
كاله الكرخي قبل من جان الفلس
( برلمان اهل المحابس والمدس )
إستاديه كله صارت ...... بالعلس
ليش الشعب ما ياخذ ...... درس
عايش بحلم وردي ..... من زمان
و جنه نحلم أيصير عدنه برلمان
~~~~~~~~~~~~~~~~~~~~~~~~~~~~~~~~~~
كل جلسه صارت ........ بيه لغوه
وما بقه ..... لاي عضو ..... نخوه
و الرئيس متنبل و ماخذله غفوه
واليعارض بس طلع لزكوله عبوه
وال يأيد ... دوم كسبان ... الرهان
وجنه نحلم يصير عدنه برلمان
~~~~~~~~~~~~~~~~~~~~~~~~~~~~~~~~~~
شوف هاي الناس كله مبهذله
وهمه عيشتهم صفت متعدله
و أرصدتهم بالبنوك ..... متلتله
و صفت احلام الشباب معلعله
وفوك كل هذا و بعد ماكو ضمان
وجنه نحلم إيصير عدنه برلمان
~~~~~~~~~~~~~~~~~~~~~~~~~~~~~~~~~~
للشرف كله ...... تصير معنونه
ويدعي التأريخ ...... هو مدونه
واليضده بكل وقاحه .... يخونه
و الله خليتوا البشر متسودنه
و الذبح للناس صار وي الأذان
جنه نحلم إيصير عدنه برلمان
~~~~~~~~~~~~~~~~~~~~~~~~~~~~~~~~~~
حكومتنا الرشيده نايمه ومغلسه
و بين يوم و الليله صارت مفلسه
مثل قنينة ...... الغاز ..... منفسه
وأحوال البلد جنه دجاجه مهلسه
وصار كل البيض .. سهم البرلمان
جنه نحلم إيصير عدنه برلمان
~~~~~~~~~~~~~~~~~~~~~~~~~~~~~~~~~~
نجاح ناجي اللوزه
بغداد ....... ٦ / ٨ / ٢٠