( الصنم ) \\\\ نجاح ناجي اللوزه

( الصنم ) \\\\ نجاح ناجي اللوزه
~~~~~~~~~~~
راح الصنم جانه صنم ........... بيضتوا وجه للصنم
~~~~~~~~~~~~~~~
تبقه العراق الغالي ............ يل بيرغك ضل عالي
وسفه صفت للتالي ............ وضيع الراعي الغنم
بيضتوا وجه للصنم
~~~~~~~~~~~~~~~~
شلون صرنا بهل الحال .......... ضيع عمرنا الترحال
بينا الوكت صال وجال ......... والي سلم بينا انهزم
بيضتوا وجه للصنم
~~~~~~~~~~~~~~~~
القتل عدنا انواع ............... وبالتفرقه صرنا سباع
تاليه تحكمنا رعاع ............. ياهو اليجي شايل علم
بيضتوا وجه للصنم
~~~~~~~~~~~~~~~~~
الطلع يوم الجمعه ........... لا اذن عدنا سمعه
وياريت امه تكمعه ........... لا واحد المنهم سلم
بيضتوا وجه للصنم
~~~~~~~~~~~~~~~~~
دمروا كلشي بالبلد ........... بالدول ما بقوا سند
والزرع ابدا ما حصد ........ والحصد من عدنا انهظم
بيضتوا وجه للصنم
~~~~~~~~~~~~~~~~~
كل يوم راتبهم عله ........... والعيشه النا معلعله
وراتبنا منهو القلله ........... بس إلهم تلوك النعم
بيضتوا وجه للصنم
~~~~~~~~~~~~~~~~~
راح النفط وارباحه .......... عيشتهم صفت مرتاحه
يركض ركض بالساحه .......... بين الحراميه ازدحم
بيضتوا وجه للصنم
~~~~~~~~~~~~~~~~
بالرشوه التريده يصير ......... ويتكرم البي تقصير
اليمشي عدل دوم يحير ..... وبزمانه بس هو انظلم
بيضتوا وجه للصنم
~~~~~~~~~~~~~~~~~
القانون لا يحمي الناس ...... والظالم اصبح علاس
بهل الوضع شاب الراس .... وبحكم العشاير انصدم
بيضتوا وجه للصنم
~~~~~~~~~~~~~~~~~
يا شعب عوف الحاقد ...... ولا تنتخب كل فاسد
كل مره من يواعد ....... الشرف من عنده انعدم
بيضتوا وجه للصنم
~~~~~~~~~~~~~~~~~
راحت ضياع الايام ........... وكثرت علينا الاقزام
بالبلد كثره الايتام ........ منهو الذي بينا افتهم
بيضتوا وجه للصنم
~~~~~~~~~~~~~~~~~
يمته يعود النا الامل ............... و نعيش بلايا وجل
نترك الما عنده خجل ...... بعد الصنم جايب صنم
بيضتوا وجه للصنم
~~~~~~~~~~~~~~~~~

تركيا ...... 2017