زوج و زوجة بقالهم كتير مجوزين. \\\\\ مرقص اقلاديوس

زوج و زوجة بقالهم كتير مجوزين. \\\\\ مرقص اقلاديوس
يعنى تقدر تقول هوا خمسة و خمسين.
و هيا تمانية و أربعين.
ظهرلتلهم ساحرة
قالتلهم ..كل واحد فيكم يطلب أمنية.
إنتوا تطلبوا بمزاجكم و أنا أنفذ بمزاجى.
بس عاوزة أمنية كلماتها واضحة بسيطة.
مش عاوزة أحاجى.

الزوجة قالت...
أنا من زمان نفسى ألف العالم.
أتفرج عليه أنا و زوجى حبيبى.
أشوف الدنيا بقا و أتمتع بنصيبى.
الساحرة قالتلها ماشى...
و بعد ثوانى لقت الزوجة
فى ايديها تذاكر سفر.

الزوج قال ..
معلش يا زوجتى يا حبيبتى.
أنا عاوز عروسة
أصغر منى بعشرين سنة.
أرجع بيها شبابى اللى راح
و أعيش كام يوم هنا.

الزوجة قالت للساحرة.
ينفع أبدل الأمنية و تصغرينى أنا.
الساحرة قالتلها...
أمنيتك خلاص طلبتيها
و ما ينفعش الرجوع فيها.
الزوجة سكتت.
بس الحقيقة الدمعة فرت من عينيها.

الساحرة سقفت
و قالت للزوج خلاص أمنيتك إتحققت.
الزوج لقا زوجته بتبحلق فيه.
قال للساحرة فيه إيه.
قالتله..روح بص فى المراية.
راح بص لقا نفسه كبر عشرين سنة.

قال للساحرة..
و دلوقتى أنا أعمل إيه.
قالتله ..أبدا لف معاها الدنيا.
وإتمتع بيها.
و أديك هتتفرج على جميلات
من ست قارات.
و دى لوحدها أمنية
ما حدش يحلم بيها.
قلت إيه
الزوج قاللها ماشى..
بس الحقيقة الدمعة فرت من عينيه.
قصة من الحكى الشعبى
أعاد صياغتها فنيا العجوز