نهار ف العام \\\\ بقلم ادريس جبيلو المغرب

نهار ف العام

السلام عليكم
هانا جيتكم
كيف داك العام
بالشواية والفحم
راني جاي وجايب
للصغير وللشايب
جايب معايا الحولي
وكل عام نوللي
جيت وماناسي حد
كلها وعلاش قد
حتى اللي ماعندوش يعيد
حوليه راه عند شي جيد
ربي مخلليه لو عندو
والله مايخلف وعدو
إيه هيه واهيا هاداك
آش كتگول
واش انت مهبول
كاين شي صح
ولا غير كتمزح
هاد الشي كان زمان
والقوم خلفوه قومان
اليوم تگادت
اشري تمضغ
اكري تبات
الناس تبدلت
بلسانها تلدغ
وتحميها للغوات
ضحكو آسناني
الحولي مابقى يكفاني
التلت مابقيت نصدقو
ف كروش هادو كنفرقو
وفيا السكار
يتخاصني بگري ولا معز
والوزيعة قبالت الدار
دايرة جوقة وعز
نوض المسكين
اجمع شطايطك
ماشافوك عينين
بلط الزبل ف حايطك
وشي بطانة ف الحين
نشرها ف سلك شراوطك
ٱمول النوبة
ٱمول الرجا والتوبة
باع... وجدوا راسكم
هانا جيتكم
مرحبا بيا ف بيتكم
يفرحوا اولادكم
باع... باع... باع
ب شحال هاد المبروك
سمين عالف ومدكوك
باقين على الله
راهم عطاوك
اللي عطى ماادى
گالك صادقو ولا فارقو
الگرن ملوي
وف التمان يكوي
قل م الربعين ماتدوي
يلا بغيتي تحمر وتشوي
الگديًد الكرداس وماتنوي
نهار ف العام
حير الاقلام
فدية وسلام
من رب الانام
وتٱكدت السنة
غزل الحديث المعنى
ف العمر حتى يفنى
اليوم صبح محنة
والمعفي ماتهنى
كن غ زيانت الحروف
ونضمت قصيدة الهتوف
يطرب غناها بالمعروف
مايخلعنا تبعبيع الخروف
باع... باع... باع... باع...

بقلم ادريس جبيلو
المغرب